ԱՀՆ-ն և ՖԶԳ-ն ստորագրել են մատչելի ու սոցիալական բնակարանաշինության ընդլայնմանն ուղղված համաձայնագիր

2026 թվականի հոկտեմբերի 1-ին Ազգային Հիփոթեքային Ընկերությունը (ԱՀԸ) և Ֆրանսիական զարգացման գործակալությունը (ՖԶԳ) ստորագրեցին 23 մլն ԱՄՆ դոլարին համարժեք՝ ՀՀ դրամով տրամադրվող ֆինանսավորման համաձայնագիր, որը կարևոր իրադարձություն է Հայաստանի բնակարանային ոլորտի զարգացման համար։ Համաձայնագիրը Ազգային Հիփոթեքային Ընկերության անունից ստորագրեց ընկերության գլխավոր գործադիր տնօրեն Էդմոնդ Վարդումյանը, իսկ Ֆրանսիական Զարգացման Գործակալության անունից՝ Եվրոպական հարևանության և ընդլայնման հարցերով տարածաշրջանային տնօրեն Ռիմա Լը Կոգիկը։

Սա ՖԶԳ-ի կողմից տարածաշրջանում տեղական արժույթով տրամադրվող առաջին վարկն է՝ մատչելի և սոցիալական բնակարանային ապահովումը դարձնելով Հայաստանի ներառական զարգացման օրակարգի կարևոր ուղղություններից մեկը։

Ակնկալվում է, որ ֆինանսավորումից կօգտվի շուրջ 850 մարդ՝ առանձնահատուկ ուշադրություն դարձնելով Լեռնային Ղարաբաղից տեղահանված անձանց, որոնց համար նախատեսվում է ֆինանսավորման առնվազն 50 տոկոսը, ինչպես նաև կանանց։ Գործընկեր բանկերի միջոցով ԱՀԸ-ն միջոցները կուղղի անմիջապես այն ընտանիքներին, որոնք ցանկանում են ձեռք բերել, կառուցել կամ վերանորոգել բնակարան։ Սա կնպաստի անվտանգ և մատչելի բնակարանային պայմանների հասանելիության ընդլայնմանը հատկապես այն անձանց համար, ովքեր առավելապես ունեն դրա կարիքը։

Նախաձեռնությանը լրացուցիչ աջակցություն է ցուցաբերում Եվրոպական միությունը, որը կտրամադրի տոկոսադրույքի սուբսիդավորում։ Միաժամանակ, դրամաշնորհային միջոցներով ֆինանսավորվող տեխնիկական աջակցությունը կնպաստի ԱՀԸ-ի կարողությունների զարգացմանը՝ բնակարանային ֆինանսավորման սոցիալական, բնապահպանական և կլիմայական գործոններն առավել արդյունավետ հասցեագրելու նպատակով։

Հայաստանը շարունակում է բախվել բնակարանային ոլորտի էական մարտահրավերների՝ սկսած բնակֆոնդի մաշվածությունից մինչև տեղահանված ընտանիքների համար մշտական բնակարանային լուծումների շարունակական անհրաժեշտությունը։ Այս համաձայնագիրը շոշափելի քայլ է այդ մարտահրավերների հաղթահարման և ամբողջ երկրում մատչելի ու  սոցիալական բնակարանների երկարաժամկետ և կայուն հասանելիության ընդլայնման ուղղությամբ։