Երևանում մեկնարկեց բնակարանների էներգաարդյունավետ վերանորոգման «Ջերմ օջախ» ծրագիրը

2015թ փետրվարի 26-ին Երևանում՝ Էրեբունի բիզնես կենտրոնում, մեկնարկեց ՀՀ-ում բնակարանային միկրովարկավորման և բնակելի անշարժ գույքի էներգաարդյունավետության բարձրացմանն ուղղված «Ջերմ Օջախ» ծրագիրը:

Մեկնարկը կայացավ Ֆրանսիական Զարգացման Գործակալության (Agence Française de Développement), Հայաստանում Եվրոպական Միության, ծրագրին մասնակից բանկերի և վարկային կազմակերպությունների, էներգաարդյունավետ սարքավորումներ մատակարարող, գովազդային ծառայություններ մատուցող ընկերությունների ներկայացուցիչների համատեղ մասնակցությամբ, որի ընթացքում մանրամասն ներկայացվեցին Ծրագիրը և նրա վեբ կայքը:

«Ջերմ Օջախ» ծրագրի շրջանակներում  ֆինանսական հաստատությունների կողմից տրամադրվող վարկերի վերաֆինանսավորումը իրականացվելու է Ֆրանսիական Զարգացման Գործակալության կողմից Ազգային Հիփոթեքային Ընկերությանը տրամադրված վարկային գծի միջոցով:

«Ջերմ օջախ» ծրագրի նպատակն է հնարավորություն ընձեռել ՀՀ-ում ցածր եւ միջին եկամուտ ունեցող ընտանիքներին իրականացնել բնակարանների վերանորոգում, բարելավել կենսապայմանները, նվազեցնել բնակարաններում էներգիայի ծախսերը, ինչպես նաեւ նպաստել  էներգախնայող բնակարանային ֆոնդի զարգացմանը ՀՀ քաղաքներում եւ գյուղերում:

Յուրաքանչյուր վարկի համար Եվրամիության Հարևանության Ներդրումային Ծրագիրը (ՀՆԾ)  տրամադրում է 5% կամ 10% բոնուս-դրամաշնորհ, եթե վարկը համապատասխանում է  էներգաարդյունավետ վերանորոգման սահմանված չափանիշներին:

«Ջերմ Օջախ» ծրագիրը մշակվել է Ֆրանսիական Զարգացման Գործակալության կողմից Եվրամիության Հարևանության Ներդրումային Ծրագրի տեխնիկական աջակցությամբ, որը ենթադրում է նաև աջակցություն ՀՀ ֆինանսական կազմակերպություններին  բանկային պրոդուկտի մշակման գործընթացում: Մասնավորապես, տեխնիկական աջակցությունն իրականացնում է ավստրիական «Կոմունալկրեդիտ փաբլիք քոնսալթինգ» (KPC) ընկերությունը գերմանական «ՄիկրոԷներջի ինտերնեյշնլ» (MEI) ընկերության եւ հայկական Ազգային Սոցիալական Բնակարանային Ասոցիացիա (ԱՍԲԱ) հիմնադրամի հետ համատեղ:

Ծրագրի վերաբերյալ առավել մանրամասն կարող եք ծանոթանալ հետևյալ հոդվածից: